AXOBER Asociación de Xóvenes Empresarios de Bergantiños

Actualmente No tiene El Plug-in ADOBE FLASH PLAYER
necesario para poder visualizar correctamente esta web:

Pulse en el enlace inferior para descargarlo

obtener FLASH PLAYER


Contedor correspondente a un visor de fotos flash que mostra os logotipos das empresas acollidas a AXOBER

Novas


  •  DESCONTOS EN FORMACIÓN A SOCIOS DE AXOBER
  • LIMPEZA DENTAL GRATIS
  • Abertal - Empresasdacosta.com
  • 30% DESCONTOS EN ARTIGOS DE PEL
Ver todas as ofertas

MOTOS VITOLO


15-10-2018
Empresas con historia



MOTOS VITOLO, 67 ANOS SOBRE DÚAS RODAS



Tal vez hoxe en día o nome de Evaristo Fidalgo Periscal poida resultar descoñecido para as novas xeracións de carballeses e carballesas, pero se falamos de Motos Vitolo seguro que non hai neno/a, mozo/a ou adulto de Carballo e incluso da Comarca de Bergantiños que non a coñeza porque, desde hai máis de seis décadas, por esta empresa familiar pasaron milleiros de bicicletas, ciclomotores e motos de todas as marcas, tamaños, cores e modelos. Por iso, hoxe desde Axober queremos repasar a traxectoria dunha Empresa con historia que fixo das dúas rodas un negocio e unha paixón.

O de Evaristo “Vitolo” pola bici foi amor a primeira vista. Xa de neno lle gustaba entreterse na rúa Hórreo argallando entre as rodas e as gomas que atopaba no que probablemente foi o primeiro taller de aluguer e reparación de bicicletas de Carballo, o do seu tío Evaristo Periscal. Con el aprendeu o oficio que máis adiante lle ensinaría tamén a dous dos seus fillos, Fernando e José Luis. Unha das súas habilidades máis recoñecidas era a de centrar coma ninguén as rodas das bicicletas, algo que fixo case cos ollos pechados ata despois de xubilado. Pero a el non só lle gustaba reparalas, senón tamén reconstruílas, personalizalas e pasear nelas. De feito, era frecuente velo enriba dunha calquera día e a calquera hora.

Con tan só 24 anos, dúas bicis súas e tres prestadas arrincou na metade do século pasado un dos negocios máis prósperos do noso comercio local. Ao principio, só se dedicaba á reparación e ao aluguer, porque a escaseza económica da época non daba para máis, e por tan só 1 peseta, as familias mellor situadas do pobo tiñan paseo garantido toda a tarde. A finais dos 50 do taller da rúa Travesa 12 (actual rúa Cinceiro s/n) comezan a saír as primeiras motos e ciclomotores. Montesa e Derbi eran as marcas de referencia para quen buscaba nas dúas rodas un medio de transporte rápido e seguro para ir traballar. Moi pronto a Derbi de tres marchas, tamén coñecida como Derbi “obreira” converteríase na máis vendida do mercado. Tanto era así, que na fábrica de Calvo a zona de aparcamento estaba reservada case en exclusiva para as motos nas que se desprazaban os empregados.

Anos 80, a época dourada

A mediados dos 60, “Vitolo” (que nunca soubo a orixe do seu alcume) e a súa dona Mª Victoria Cerviño trasladáronse a vivir á rúa Vitoria e abriron, no baixo da casa, a histórica tenda na que permanecerían máis de 40 anos. Quen non lembra aquel escaparate repleto das mellores marcas e os últimos modelos? Pouco a pouco foron ampliando o negocio e introducindo novos produtos como motoserras e todo tipo de maquinaria e accesorios para bosque e xardín. Coa venda en exclusiva das bicicletas “Orbea” e “BH” e os ciclomotores Derbi “Variant”, que causaron un auténtico furor entre os nenos/as e adolescentes dos anos 80, chegou a época dourada dun negocio en expansión no que traballaba toda a familia e que ampliaron a Malpica de Bergantiños coa apertura dunha delegación na rúa do Rio, que permanecería aberta ata o ano 1995.

67 anos despois daqueles tímidos e arriscados inicios, Motos Vitolo segue a ser un referente na venda e reparación de bicicletas, ciclomotores e motos de gran cilindrada así como accesorios e complementos ou maquinaria de xardín. O prestixio e a calidade das mellores marcas e un trato próximo e amable co cliente seguen a ser o sinal de identidade da empresa que na actualidade dirixe Fernando Fidalgo Cerviño, “Vitolo” para todo o mundo, desde o seu establecemento da rúa Pontevedra 11, e no que o recordo do seu pai está sempre presente a través do que tanto amaba: a súa bici e a súa moto. Parabéns!


HERFRAGA


04-10-2018
Empresas con historia



HERFRAGA, A ORIXE DUNHA REVOLUCIÓN INDUSTRIAL


Nun pequeno taller mecánico da rúa Ponte José Fraga Varela comezou a escribir hai case nove décadas a historia da que hoxe en día pode ser, sen medo a equivocarnos, a decana do tecido empresarial carballés. Pouco ou nada diso se podía imaxinar o seu fundador cando en 1930 puxo a funcionar o seu humilde negocio, non moi lonxe do emprazamento que a empresa ocupa actualmente na rúa Poñente 14-16. Co paso do tempo, o antigo local destinado á reparación de coches e maquinaria de todo tipo, sobre todo agrícola e de madeira, foi medrando a pasos de xigante ata converterse nun referente a nivel internacional na fabricación e reparación de maquinaria industrial paseando o nome de Carballo polo mundo enteiro. Na actualidade, a fiabilidade e calidade do seu produto seguen a ser os sinais de identidade dunha empresa familiar, en mans agora da terceira xeración, da que en Axober nos sentimos orgullosos de ter como socia.

En plena década dos 50, a capacidade emprendedora de José Fraga e o auxe do sector industrial fan que o negocio dea un cambio de 180 graos orientando a súa produción á fabricación de maquinaria para a industria conserveira, actividade que se convertería no piar principal da empresa e no segredo do seu éxito ata os nosos días. Os cambios tamén afectarán ás instalacións. Atrás queda o taller de aluguer de “Fraga” para trasladarse a unha nave, máis moderna e espazosa, situada na mesma rúa, a uns metros de distancia, no lugar que ocupa hoxe en día.

Pero a gran “revolución industrial” chegou da man dunha empacadora de atún e pescados que introducía o produto directamente nas latas. A primeira foi patentada en 1961 e, tras ela, outras catorce máis que lle valerían o recoñecemento profesional do que goza na actualidade. Desde entón, Herfraga (constituída como sociedade anónima en 1979) non parou de medrar e expandirse a novos mercados. Agora, a terceira xeración do negocio familiar exporta preto do 80% da súa produción total a máis de 50 países distribuídos polos cinco continentes, mentres que os envíos de maquinaria nova superan o 90%. Entre os seus destinatarios figuran lugares como Tailandia, Ecuador, Yemen, Cabo Verde, Portugal, Italia, Rusia ou Costa de Marfil.

Arredor dunha trintena de profesionais, formados na propia empresa, son os encargados de sacar adiante unha media de 30 empacadoras ao ano (arredor de 1.500 no últimos 50 anos) xunto con pezas auxiliares como aceiteiras, saladores e cintas de transporte, entre outras, ademais do servizo de reparación e mantemento de máquinas usadas.

A implantación de novos avances tecnolóxicos e a flexibilidade na fabricación seguirán a ser as máximas dunha empresa familiar que, tras unha traxectoria de 88 anos e tres xeracións, busca seguir adaptándose á demanda dun mercado en constante evolución, con novas necesidades, novos gustos e novas formas. Parabéns!



ASEMBLEA XERAL EXTRAORDINARIA


01-10-2018
AXOBER
CONVOCATORIA DE ASEMBLEA XERAL EXTRAORDINARIA



Día:
25-10-2018

Hora:
20:30 h. en primeira convocatoria
21:00 h. en segunda convocatoria

Lugar:
Axober, r/. Fomento, 21-23, 1º Carballo

Orde do día:

1. Análise da ruptura do convenio de colaboración entre Axober e CCA Carballo e medidas a adoptar.





Asdo.; Isidro Varela Bardanca
Presidente

CALZADOS MARIÑO


28-09-2018
Empresas con historia
CALZADOS MARIÑO, UNHA FAMILIA AOS TEUS PÉS



Din que os oficios non se herdan, senón que se aprenden, pero no caso do protagonista da nosa seguinte “Empresa con historia”, vai no seu ADN. En Calzados Mariño levan vestindo os nosos pés desde hai case oito décadas. Primeiro facéndonos os zapatos a medida e logo adquirindo e vendendo para xeracións e xeracións de carballeses e carballesas as marcas máis exclusivas do mercado. Na actualidade, na vella tenda da rúa Coruña, que conserva intacto o seu aspecto de antano, os novos modelos conviven cos recordos e as anécdotas que aínda zumegan dos seus andeis, os primeiros, igual que o mostrador detrás do que se atopa dende hai máis de corenta anos Celsa Lorenzo, a nora do fundador dunha empresa familiar con moitas historias que contar.

E a de Calzados Mariño nace na Praza de Galicia en 1940 cando un mozo de Berdillo chamado José Mariño Rabuñal decide instalarse en Carballo e apostar por un negocio pioneiro e arriscado para unha época de crise na que poucas familias podían permitirse o luxo de ter uns zapatos e, quen os tiña, gardábaos para as ocasións máis especiais. Mariño aprendeu o oficio de zapateiro dunha familia de artesáns veciña súa, os Serrano. Nos seus inicios, dedicouse a vender polas feiras os modelos que el mesmo elaboraba coas súas propias mans pero pouco despois, grazas ao seu espírito emprendedor, a situación cambiaría.

A actual zapatería, situada na rúa Coruña 7, abriu as súas portas no ano 1944 como comercio e taller, onde aprendices, oficiais e mestres elaboraban á man os modelos dunha clientela á que ensinaron, pouco a pouco, a vestirse polos pés. E os que tamén aprenderon foron os seus sete fillos que herdaron a paixón do seu pai polo negocio familiar. Sabina, unha das fillas, abriu a súa propia tenda (Calzados Mira) e Estrella fixo o propio situándose, na mesma rúa, ó fronte dunha zapatería infantil que levaba o seu nome ata que a súa filla María José tomou o relevo, agora xa na rúa Desiderio Varela 34. Enrique, o seu benxamín, máis coñecido como “Quico Balay”, tomou as rendas da tenda familiar para dedicarse en exclusiva á venda de calzado. Alí coñeceu e namorouse da súa dona Celsa Lorenzo, que axudaba no negocio desde os quince anos. Ela é a que se encarga hoxe en día da vella zapatería así como da que abriron no ano 1989 na rúa Camiño Novo 11.

Aínda que xa nada queda daqueles tempos nos que se mercaban os zapatos medindo os pés cun carabullo, a calidade do seu calzado e o trato afable e persoal cos clientes permanecen inalterables como un selo de garantía. Ao marrón e negro de mediados do século pasado súmase agora un amplo abano de cores, números e anchos especiais con modelos exclusivos tanto para o día a día como para os eventos máis festivos. Tal vez por iso e pola súa capacidade de adaptación aos novos tempos, gustos e necesidades, son agora os netos/as e os bisnetos/as dos compradores/as do vello Mariño os/as que continúan achegándose ata as súas tendas na procura de comodidade e deseño para os seus pés. E tamén por iso e pola súa firme aposta polo comercio local, desde Axober sentímonos honrados/as de que figure entre os nosos socios. Parabéns!


AXUDAS AOS PROXECTOS DE INVESTIMENTO EMPRESARIAL (2018)


27-09-2018
IGAPE
Obxectivo
Estimular a posta en marcha de proxectos de investimento empresarial en Galicia, coa finalidade principal de dinamizar a actividade económica na Comunidade Autónoma e potenciar o mantemento e creación de emprego, a través do desenvolvemento e mellora das empresas existentes, así como coa creación e posta en marcha de novas iniciativas empresariais.

FICHA AXUDA


BASES REGULADORAS

JOYERÍA SEOANE


24-09-2018
Empresas con historia


JOYERÍA SEOANE, CALIDADE E PRESTIXIO DESDE HAI MÁIS DE 50 ANOS


Con dous espertadores, dous reloxos de campá e tres modelos de señora e cabaleiro arrincou en 1960 a historia que hoxe vos achegamos na nosa serie de “Empresas con historia”. Tras aprender o oficio no taller de “Barca”, situado na rúa Gran Vía, Edelmiro Seoane Caamaño decidiu emprender o seu propio negocio na rúa Coruña xunto ao seu compañeiro e amigo “Brandón”, outro coñecido reloxeiro carballés que dous anos máis tarde aparcaría por un tempo a profesión. Con pouco máis de vinte anos asume as rendas dunha empresa, á que pouco despois se sumou a súa dona Dolores Varela “Lola”, para converter o oficio no seu sustento e o traballo na súa paixón.

Edelmiro lembra con cariño e certa melancolía o pequeno taller de venda e reparación de reloxos no que empezou a traballar na rúa Coruña 2, con apenas espazo para atender á clientela. Aínda así, o ir e vir da xente era continuo nunha época na que non existían os reloxos de pila e os arranxos de mecánica estaban á orde do día. Un dos máis demandados era a reparación do eixe do volante, unha peza que rompía con moita facilidade. De feito, durante anos, este mestre reloxeiro de pulso firme e gran habilidade coas mans optou por demostrar aos seus clientes a calidade dos novos modelos golpeándoos sobre a súa mesa como selo de garantía, un xesto que asegura “fíxeno tantas veces que acabei por ter o sitio marcado”.

A finais da década dos 60, o poder adquisitivo das familias foi aumentando e con el tamén a demanda de artigos de xoiería entre os que destacaban algúns complementos básicos en ouro e prata (cadeas, pulseiras, aneis, escravas...) e os primeiros xogos de café e té que se vendían como un prezado agasallo.

Nos anos dourados da emigración (décadas 70 e 80), as vendas seguiron disparándose acadando o seu punto máis álxido durante o verán e o Nadal, coincidindo coa tempada de vacacións de moitas familias de emigrantes que aproveitaban a súa estancia no pobo para mercar regalos para toda a familia. “Se tiña corenta reloxos na tenda, nun dia de feira podía vender a metade. Eran outros tempos nos que a xente reparaba máis na calidade das pezas que no seu custe”, asegura Seoane cando lembra o “boom” do comercio local.

Xunto a firmas nacionais tan destacadas como Duward, na Joyería Seoane podíanse atopar reloxos personalizados para home e muller coa súa propia marca baixo o nome comercial de Edelseo (Edelmiro Seoane), unha proposta que tivo gran aceptación entre a clientela, durante algo máis dunha década, ao igual que os gravados que el mesmo realizaba e que, na actualidade, xa xubilado e a piques de celebrar o seu 80 aniversario, segue a facer por afección.

Agora, a súa filla María é quen está á fronte do negocio familiar, situado no número 15 da rúa Coruña, nun amplo e moderno local onde locen as coleccións de reloxos máis sofisticadas xunto ás últimas tendencias en alta xoiería e un obradoiro propio no que se realizan traballos artesanais a medida. Un traspaso xeracional que asumiu de forma progresiva e natural tras criarse na tenda-taller dun dos xoieiros con máis historia de Carballo e un referente para moitos compañeiros de profesión entre os que figura Antonio, o actual responsable do servizo técnico da xoiería, ao que tan só lle falta un ano para retirarse despois de 45 anos traballando nunha empresa que considera a súa casa, e xunto a unha familia que tamén é a súa.
Parabéns!



BEBIDAS E BODEGAS CARBALLO


19-09-2018
Empresas con historia


BODEGAS CARBALLO, TRES XERACIÓNS CON D.O.


O feito de que Carballo contase cun dos fielatos ou impostos máis baixos da provincia na primeira metade do século pasado fixo posible que moitas empresas e negocios da época elixiran o noso concello para botar raíces, contribuíndo a xerar riqueza e emprego no municipio ata convertela nun dos piares comerciais da contorna. Moitos deses proxectos aínda seguen en pé hoxe en día grazas á aposta empresarial dos seus fundadores e a un legado que souberon transmitir de pais/nais e fillos/as. Este é o caso de Bodegas Carballo, protagonista da nova entrega de Empresas con historia e dun dos socios máis antigos cos que temos a honra de contar en Axober, que xa vai pola terceira xeración.

Din que os comezos nunca son doados pero en plena década dos 50 aínda o eran menos. Unha industria emerxente, as minas de volframio, os Baños Vellos e uns aranceis bastantes accesibles para a época foron determinantes para que o matrimonio formado por José Fernández Sánchez (Betanzos) e Carmen Casal Babío (Carral) decidira trasladarse a Carballo no ano 1954 para iniciar unha nova vida á fronte dunha pequena taberna que abriron na rúa Vázquez de Parga, 68 baixo o nome de O Bodegón, como non podía ser doutro xeito xa que o seu fundador era vendedor de bodega en Betanzos, actividade que continuou exercendo na nosa localidade xunto co despacho da taberna. Mentres, a súa dona encargábase de dar o xantar aos xornaleiros das fábricas que cada día acudían a degustar exquisitos menús, compostos de primeiro e segundo prato, sobremesa, bebida, café e pan, polo módico prezo de 10 pesetas. Os que non podían permitirse ese luxo tamén eran ben recibidos. Levaban a comida da casa e mercaban o viño e o café no bar. A especialidade da casa era o cocido, a fabada e os callos que Carmen elaboraba con mimo e tempo, ademais dalgún que outro segredo que, como é normal, gardábase para ela.

I Campionato de ra

Nos anos 60 non había móbiles, nin tabletas, nin conexión a internet. Por haber, non había case nin xoguetes. Pero a diversión e o entretemento estaban aseguradas. De feito, sen saber moi ben como nin por que, no Bodegón era raro o día no que veciños e clientes non se animaran a botar unha partida ao popular xogo da ra. A afección era tan numerosa que de seguido se creou unha sociedade e se organizou o I Campionato de ra de Carballo. E como trofeo, unha copa de barro de Buño.

Na bodega situada na parte de atrás da casa, onde vivían xunto aos seus dous fillos, amoreábanse os barrís de viño tinto, branco e rosado, as tres variedades que non podían faltar en ningunha mesa, e que, como todo naquela época, vendíase a granel. Pouco a pouco o almacén foi incrementando a súa actividade, a súa clientela e os seus traballadores, incorporándose, sendo aínda un mozo, o seu fillo pequeno Juan José Fernández Casal, a segunda xeración dunha familia de bodegueiros.

En 1973 trasládanse ao almacén da rúa Alfredo Brañas e a empresa comeza a especializarse na distribución de bebidas á hostalería, que na actualidade ocupa o 90% do seu volume de negocio e unha área de reparto que se estende polas comarcas de Bergantiños, Soneira e Ordes. Desde entón, a empresa non deixou de medrar. En 1992 ampliouse coa adquisición dunha nave no Polígono Industrial de Bértoa e a incorporación de novos traballadores, incluído un dos netos do fundador, Juan Carlos Fernández, hai máis de quince anos. A súa é xa a terceira xeración dedicada ao negocio familiar.

Na actualidade, unha ampla carta de viños selectos e con Denominación de Orixe (D.O), bebidas de alta gradación (licores, xenebras), cervexas nacionais e de importación e unha gran variedade de selectos produtos como chocolates, aceites, batidos, mel, zumes e refrescos satisfai os gustos e as necesidades dunha clientela, cada vez máis esixente e heteroxénea, que segue apostando pola calidade e a confianza que outorga ser unha das bodegas con máis historia do noso concello.



ZAPATILLERÍA SUSA


11-09-2018
Empresas con historia




ZAPATILLERÍA SUSA, 60 ANOS REINVENTANDO O NEGOCIO FAMILIAR


Desde as súas orixes, este establecemento situado na rúa Sol foi taberna, cordelería, zapatillería e agora tamén tenda de encaixes.

Cando a protagonista da nosa segunda entrega de “Empresas con historia” abriu por primeira vez as súas portas ao público hai xa 60 anos, a realidade era ben distinta, tanto dentro coma fóra do establecemento. Estradas empedradas sen apenas coches circulando por elas, nenos e nenas xogando na rúa e unha sociedade de autoconsumo na que todo se vendía a granel. O paso do tempo fixo que todo mudara agás a súa esencia, que aínda conserva intacta nada máis entrar neste negocio familiar situado na rúa Sol, número 3.

A mediados do século pasado, Susa Lema e o seu marido trasladáronse de Muxía a Carballo-tras varios intentos frustrados de emigrar a Sudamérica- para tomar as rendas dunha tenda coñecida como "taberna nueva", un ultramarinos da época no que tanto se podía tomar un viño como almorzar ou mercar produtos de todo tipo: bacallau, aceite, arroz e azucre “ao peso”, que medían coa vella balanza que aínda conservan, doces, aspirinas e algunhas das bebidas máis consumidas por aquel entón como coñac, anís, xerez e, sobre todo, augardente e viño. Pero, entre o máis curioso destaca a venda de petróleo para alimentar as lámpadas de finais dos anos cincuenta cando aínda non había electricidade nos fogares. Por aquel entón, o negocio era tamén unha cordelería na que se vendían cordas de esparto, de cáñamo e de plástico, que Susa e o seu marido se encargaban de preparar a conciencia para os clientes segundo o uso que lles quixeran dar: labores agrícolas, atar o gando, facerlle lazos ás ovellas... De esa época, a tenda aínda conserva no letreiro da fachada o nome de “zapatillería e cordelería” porque como ben recorda a fundadora do negocio “tiñamos máis quilos de corda na nosa casa que en todo Carballo”.

Reinventarse ou desaparecer?

Pouco a pouco, a sociedade foise modernizando e as familias deixaron de vivir só do que cultivaban. Chegou a abundancia e tamén o consumismo. As tendas-taberna nas que se podía mercar de todo comezaron a desaparecer coa chegada dos supermercados, cos que os pequenos comerciantes locais non podían competir nin en cantidade nin en prezo. Pero, lonxe de desaparecer, o negocio de Susa reinventouse para subsistir especializándose na venda de calzado de traballo, modelos cómodos para a vida diaria e zapatillas de uso doméstico que, iso si, eran só para as mulleres porque para os homes era unha vergoña usar ese tipo de calzado. Ao principio, só se vendían “pantuflas” de pano en cor escuro e con ondulacións na parte dianteira para a xente maior e as mozas casadas. Á súa tenda chegaron despois os primeiros modelos de “fantasía” que houbo en Carballo, con cores e estilos para todos os gustos así como unha ampla variedade de complementos que aínda se poden atopar nos seus estantes.

Dende hai unha década, a súa filla Chus encárgase do negocio familiar ao que volven, unha vez máis, aires renovados e o espírito emprendedor que, sen dúbida, herdou dos seus pais para continuar dando vida a un dos establecementos máis antigos de Carballo. Gran experta e coñecedora do encaixe de bolillos, a actual propietaria leva xa anos ofrecendo aos clientes unha ampla variedade de materiais e confección de artigos de encaixe elaborados con mimo e calidade, entre os que podemos atopar desde fermosos abanos para todo tipo de eventos e circunstancias ata puntillas para a roupa do fogar, decoración ou prendas de vestir así como accesorios e téxtil para bebés, moi demandados para ocasións especiais. Ademais, a súa extensa formación e habilidade no arte de “palillar” permítelle sumar, como antano, unha nova actividade ao negocio familiar que, neste caso, pasa por ofrecer unha ensinanza profesional e personalizada tanto a particulares como a grupos reducidos.

Grazas a súa capacidade de reconversión e a súa visión empresarial, a esta antiga zapatillería da rúa Sol aínda lle quedan moitas páxinas por escribir na historia do noso comercio local xunto á súa nova especialidade: a tenda de Encaixes Chus, dúas empresas que temos a honra de ter entre os nosos socios. Parabéns!


GRUPO CALVO


07-09-2018
Empresas con historia

CALVO, 78 ANOS DANDO A LATA



A historia do primeiro protagonista da nosa serie de “Empresas con historia” é a dunha marca unida a unha familia, ou ao revés, porque despois dunha traxectoria de case oito décadas xa non se entende unha sen a outra. Principal motor da economía local durante anos e sustento para milleiros de familias carballesas e da contorna, converteuse, co paso dos anos, en líder indiscutible do mercado e un referente entre as primeiras marcas de alimentación. A súa é, sen dúbida, unha empresa con nome propio que soubo facer do seu apelido un sinal de identidade e calidade dentro e fóra das nosas fronteiras: o de Calvo, claro.

A familia Calvo aséntase en Carballo a finais do século XIX tras o seu paso por Cuba e sen esquecer as súas orixes maragatas. No ano 1940, nunha pequena tenda de ultramarinos da nosa localidade, Luís Calvo Sanz- fundador do actual grupo- decidiu dar un paso á fronte e apostar polo progreso e a innovación para garantir o futuro dun negocio de tradición familiar. Así empezou a fraguarse un proxecto que se convertería nun símbolo de calidade e tradición dentro da industria conserveira do noso país e un modo de vida para centos e centos de carballeses e carballesas.

Datas e cifras

Pero na historia da empresa hai máis datas relevantes. Unha delas, en 1952, cando a familia asiste en Vigo á demostración dunha máquina francesa de empacado mediante moldes, que lles serviu de inspiración para construír a súa propia. A outra foi en 1956 co deseño dun revolucionario aparello capaz de xerar 36 latas de atún por minuto, que cambiaría para sempre a industria conserveira española. Na década dos 60 e os 70, a compañía seguiu tomando a dianteira introducindo no mercado novidades tan pioneiras como a variedade Yellowfin (atún claro), que na actualidade equivale ao 75% das latas que se consumen no noso país, e o lanzamento en Europa do primeiro pack de tres latas de atún en formato redondo. Os resultados non se fixeron esperar e a súa inmediata expansión marcou o inicio dunha flota que non deixou de medrar ata chegar aos 7 buques atuneiros, 2 mercantes e 2 buques de asistencia cos que conta na actualidade.

Ademais de datas claves, a historia do Grupo Calvo está repleta de traballo, constancia, esforzo e sacrificio aos que lle hai que sumar grandes éxitos e outros tantos acertos tan determinantes como a súa incursión publicitaria en televisión no 1979 durante o intermedio do mítico programa “Un, dos, tres…” . Tan só tres palabras “atún, Calvo, claro” dispararían a popularidade da compañía de tal xeito que as súas vendas incrementáronse nun 40% ata converterse na marca de conservas de atún preferida polos consumidores. Se os noventa marcaron a súa expansión mundial ata convertela nunha multinacional, o século XIX chegou repleto de novos retos que a catapultaron á fama con anuncios tan populares como o famoso “Piltrafilla” ou o “sacatunn”. A excelencia da súa materia prima, a experiencia e a adaptación ás novas necesidades dos clientes, cunha ampla e variada gama de produtos para todas as idades e gustos, fixeron o resto ata e na actualidade segue a ser líder indiscutible do mercado con presencia en máis de 70 países e un cadro de persoal que supera os 4.000 empregados/as.

Pese a tantas datas relevantes e cifras tan notorias, en Axober queremos -co permiso da familia- engadir unha letra con maiúsculas que englobe e resuma a vida desta empresa con historia, que temos a honra de ter entre os nosos socios. Adiviñades cal? Aquí vos deixamos unha pista! Calidade, Confianza, Compromiso, Conserva, Consumidor, Carballo e, por suposto, Calvo, Claro! Parabéns!



CURSO REVIT NIVEL INICIAL


19-02-2018
Introdución ó BIM con REVIT ARCHITECTURE |CREACIÓN DE FAMILIAS | REVIT MEP
Este curso pretende familiarizar aos alumnos coas ferramentas e metodoloxías de traballo BIM, a través do uso do software líder no mercado: Autodesk Revit.
Para todos os técnicos e profesionais da construción, as ferramentas BIM son esenciais para a realización do deseño, coordinación, construción e/ou mantemento eficiente e produtivo. As metodoloxías de traballo BIM están baseadas nun fluxo de información de proxecto, máis que na mera documentación gráfica propia do CAD.

NOVA LEY DE AUTÓNOMOS


26-10-2017
Aprobación definitiva e publicación
Lei 6/2017, do 24 de octubre, de Reformas Urxentes do Traballo Autónomo, publicada no Boletín Oficial do Estado.

BOE

CONVENIO AXOBER - VALCARCE


03-03-2016
Descontos no combustible
Axober firma un convenio de colaboración co Grupo Valcarce, no que se contemplan importantes descontos no combustible para as empresas asociadas.
Para máis información pode contactar directamente coa Asociación.

CONVENIO DE COLABORACIÓN "LA CAIXA-AXOBER"


18-02-2015
Firma convenio

Axober firma un convenio de colaboración coa entidade financeira "La Caixa".
Este convenio ten por obxecto definir un marco de colaboración entre a entidade bancaria e as empresas asociadas a Axober, co fin de establecer relacións de tipo comercial e financeiro en condicións vantaxosas para as empresas pentences a Axober.




NOVO SERVIZO WEB PARA SOCIOS


29-11-2012
PRESENTACIÓN
Esta Asociación pon en marcha un novo servizo para asociados dentro da páxina Web.

Isto consiste na incorporación dun novo sistema de ofertas para socios/as co fin de acercar a súa actividade á rede. Cada empresa poderá remitir a Axober as súas ofertas para publicar na Web. Todas elas aparecerán na portada de xeito aleatorio, para non discriminar ningunha entrada e poderase acceder á listaxe de todas as ofertas das empresas da Asociación.

Do mesmo xeito, para facilitar a localización das empresas e que os usuarios poidan achegarse ao local a realizar as súas compras, incorporouse o mapa de xeolocalización de Google Maps na ficha de cada empresa.

Buscador de Empresas
ver Oasis Restaurante Vinotecaver Perfumería Garrotever Cafetería Abastosver Inelca, S.L.ver Estación de Servizo Carvoltaver Calvelo Plateria Regalover Metalúrgica BB, S.L.ver Mármoles Gumersindo Rey, S.A.ver Formación Newtonver Savelo S.L.ver Cafetería Habanos 79ver Centro Óptico Bergantiñosver Bebidas y Bodegas Carballo, S.L.ver Mesón As Viandasver Distribucións Marcelino S.Lver -15ver Cervecería Ágoraver Taberna O Mexillónver Cristina Morgadever DV Carballover Bercom Impresión Dixitalver Todo Larver Informática Valemver Confeccións - Sastraría Miguelver Proinber Bergantiños, S.L.ver A Cervecería de Luísver Castro Parga, S.L.ver Vicarlem, S.L.ver Automóbiles Cancelaver Farmacia Veterinariaver Cervecería La Bomboneraver Lencería Antoxosver O Barco dos Soñosver Protel Sistemas de Seguridad, S.L.ver Panadaría O Varrendeirover Talleres Antelover Fórmula Hit Radiover Benettonver Estanco Varelaver Moncho Antelo Instalaciones, S. L.ver MÍMATEver Rodaben Carballo, S.L.ver Policlínica Dental Bergantiñosver Clínica Dental Miguel Ángelver FORPONver Poppyver Para ti Cosméticosver Taberna O Patacónver Sistemas Eléctricos GMG Hipaniaver Construcións e Reformas J.A. Amarellever Xarope, SLver FN Energía - ENERGALver Atmósfera Sportver Creativa Digitalver Son Pressver Agetrans Bergantiños S.L.ver Distribucións M.Prietover  Emiliano Modaver Modas Alonsover Alquileres Reneymarver Afico, S.L.ver Donclic Soluciones Tecnológicasver Revestimientos Rama, S.L.ver Gonzacar S.L.ver Automóbiles  E. Fuentesver Transportes Mariño e Hijos, S.L.ver Panadaría  Forno Novover Andainas Centro de Ensinover SDI Alphanor, S.L.ver Mentaver Asesoría Cervantesver Café Bar Embajadorver A Barra Barver Motos Vitolover Carpintaría M.J. Eirísver Restaurante El Hórreover Manuel Loureiro Soutover A Nova Ferradoraver Punto e Comaver Alberto Castrover Asesoría Borja G. Botasver Einstein Formaciónver Calzados Mariñover Balcotex, S.L.ver Federópticos Nicolás, S.L.ver Cervecería A Taperíaver LD Ideas de Interiorver Construcións J. Souto, S.L.ver O Recreo Animaciónver Xoiaría Calvelo Seoanever El Rincón de Maríaver Talleres Tatover Amar Modaver Perfumerías Avenidaver Corte Asiaver Automóbiles Dimolk S.L.ver Autoescola Carcopaver GRUPO CALVOver Calzados Susaver Mercería - Paquetería Pilar Mªver Restaurante Mesón do Pulpover Xoiaría Seoanever Alemcaver Codiber S.L.ver GESTORIA QUEIJO, SLver Óptica Enríquezver Perruquería Samelver Contenedores Miramontesver PROHIGANver COMUNICARver Bámbolaver Trattoría - Pizzería Vesuviover Hierros Varela Urbieta, S.L.ver Varela Hostelería, S.L.ver Agropecuaria A Medoñaver Alea Asesoresver Deportes San Remover Sueiro Asesores, S.L.ver Imprenta Gervasiover Almacenes Agrover Cafetería Bar Ginebraver Gende Estudiover Moda Infantil Retoñosver Star Centerver R. Pose Distribuciónsver Refuxio As Garzasver Automóbiles Vilas Ramaver Proyekta & Concepto, S.L.ver Herfraga S.A.ver Calzados Arijónver A de Pako Restaurante - Vinotecaver Confiro, S.L.ver Muebles Luísver Carnizaría Danielver A Fragua de Mover Construcións y Promociones J. A. Villar, S.L.ver Proquiber S.L.ver Zocasver Mesón A Cabañaver Panadaría Roiserver Interfilm Carballover Viveiros Amadover Servizos Agrícolas Pose, SLver DLUXE EXPRESSver Disboa S.L.ver Inmovendaver Orchestraver Rega Morales, S.L.ver Imprenta Europaver Re 100 Galicia, S.L.ver Correduría e Xestión de Seguros Toñitover Corporación Laber, Laboratorio y Consultoría, S.L.ver Viña Textilver Caremer Tecnoespecialistasver Mundo Kid´sver De la Serna  y Calviño Avogados e Consultoresver Abertal Networks S.L.ver Establecementos Marcialver Perruquería Sole Martínezver A Barbería de Beniver Moda Suarezver José Cotelo Juncalver TForma Global
AXOBER, Asociación de Xóvenes Empresarios de Bergantiños