Información e asesoramento en Prevención de Riscos Laborais
Froito da colaboración entre a Asociación de Empresarios de Bergantiños (AXOBER) e a Confederación de Empresarios da Coruña (CEC), todas as nosas empresas asociadas poden acceder a diferentes servizos e recursos de apoio para facilitar a súa actividade profesional, resolver dúbidas e afrontar os retos da xestión empresarial.
Un dos servizos que cómpre destacar é o Centro de Información sobre Prevención de Riscos Laborais da CEC, que ten como obxectivo informar e orientar as empresas e as asociacións empresariais sobre a normativa vixente e as obrigas en materia preventiva.
Este servizo ofrece asistencia técnica, elaboración de estudos e informes, así como accións de información e sensibilización. Ademais, a CEC promove actividades formativas, talleres e xornadas para contribuír a mellorar a cultura preventiva nas empresas e favorecer contornas de traballo máis seguras e saudables.
Neste contexto enmárcase a recente xornada sobre prevención de riscos laborais organizada por AXOBER, coa colaboración da CEC, que permitiu achegar ás empresas asociadas información práctica sobre a importancia da prevención e as responsabilidades que deben asumir na protección da saúde e da seguridade dos seus equipos.
Outros servizos ao alcance das nosas empresas
A oferta da CEC abrangue tamén outras áreas de interese para a actividade empresarial:
- Asesoramento xurídico-laboral: orientación sobre contratación, convenios colectivos, xornadas, permisos, vacacións, extinción de contratos e outras cuestións laborais e de Seguridade Social.
- Asesoramento económico-fiscal: información sobre contabilidade, fiscalidade, obrigas tributarias, cuestións mercantís e posibles axudas e subvencións públicas.
- Formación: acceso a accións formativas, cursos e actividades orientadas á actualización de coñecementos e á mellora das competencias profesionais.
- Emprego e colocación: apoio nos procesos de selección, preselección de candidaturas e intermediación laboral para cubrir ofertas de emprego.
- Outros ámbitos de apoio empresarial: información e recursos en materia de comunicación, responsabilidade social, igualdade, negociación colectiva, creación de empresas e xestión administrativa.
Como consultar os servizos?
As empresas asociadas a AXOBER que desexen ampliar información sobre estes recursos ou realizar algunha consulta poden contactar coa Confederación de Empresarios da Coruña a través dos seus canais habituais.
- Teléfono: 981 174 141 / 981 133 702
- Mail: cec@cec.es
- Plaza Luis Seoane Torre 1 Entreplanta. A Coruña
A relación completa de servizos, así como os datos de contacto e as vías de consulta, están dispoñibles na súa páxina web: https://www.cec.es/servicios/
Desde AXOBER animamos ás empresas asociadas a coñecer e aproveitar estes recursos, que poden resultar de utilidade para mellorar a súa xestión e dar resposta ás necesidades do seu día a día.